Kreu Politike Rrugëtimi europian, i vetmi plan dhe alternativë

Rrugëtimi europian, i vetmi plan dhe alternativë

95
0

Konferenca për shtyp e Kryeministrit Edi Rama pas mbledhjes së Këshillit Europian:

Faleminderit!

Pas 48 orësh pa gjumë jemi këtu, në përfundim të gjithë kësaj odiseje, për të ndarë sëbashku opinionin tonë lidhur me moskonkludimin me konsensus të procesit për të cilin jemi përpjekur vijimësisht dhe natyrisht, për t’iu përgjigjur të gjitha pyetjeve.

Përpara se të hyjë në temën e Këshillit Europian, dëshiroj të ndajë me të gjithë një shpjegim lidhur me një shqetësim që e kam marrë prej një numri të konsiderueshëm bashkëqytetarësh, qofshin në Itali, qofshin këtu,  apo në vende të tjera, mbi një emision të mbrëmshëm të RAI-t, kushtuar një të mituri shqiptar në një kamp në Siri. Për fat të keq, ai emision drithërues, sipas gjithë përshtypjeve të marra, unë vetë personalisht nuk e kam ndjekur, ka lënë të kuptohet se çështja e djalit të mitur është një çështje thjesht vullneti nga ana e ambasadës sonë në Turqi, apo nga ana e ambasadorit. Kjo është tërësisht e pavërtetë.

E vërteta është që prej disa kohësh, unë kam nxjerrë një Urdhër, është një material i klasifikuar që nuk mund ta ndajmë dot me publikun për shkak të sensibilitet të lartë, lidhur me personat, familjet, individët, që gjenden në atë territor si pasojë e përfshirjes së burrave në një luftë për të tjerë, në funksion të organizatës terroriste e kriminale të ISIS-it.

Shqetësimi ynë ka lidhur me nevojën për të aksesuar pikërisht këto kampe, ku ka një numër grash dhe fëmijësh. Në bashkëpunim me partnerët  amerikanë, ne kemi zhvilluar një proces të tërë identifikimi. Disponojmë të dhëna mbi identiteti e shumë prej personave, por, e përsëris, janë të dhëna shumë sensitive për shkak se ata njerëz janë të rrezikuar në jetën e tyre në mënyrë të përditshme. Tërheqja e tyre në ato kampe nuk bëhet as me ambasada e as me ambasadorë, sepse aksesi dhe i gjithë procesi është tejet i komplikuar dhe kërkon një koordinim me partnerët.  Ne kemi punuar intensivisht. Kemi një plan të tërë veprimi, të rakorduar me partnerët tanë kryesorë. Ka një sërë grupesh të përfshira në këtë proces.

Nuk mund të ndajë më shumë informacion, por thjesht dua t’iu them të gjithëve që po të ishte një çështje ambasadash apo ambasadorësh, edhe vendet e tjera do të kishin tërhequr individët, në radhë të parë, gratë dhe fëmijët që janë viktima të drejtpërdrejta të zgjedhjeve të gabuara të prindërve apo të të afërmve. Për këtë arsye janë të përfshirë në një situatë dramatikë që nuk është zgjedhja e tyre.

Kam komunikuar dhe  me të afërmit, edhe babanë e djalit dhe ia kam sqaruar se kjo është një çështje që nuk varet nga ne. Nuk është çështje e strukturave tona diplomatike, sepse nuk bëhet fjalë për kampe refugjatësh të zakonshme.

Natyrisht që gazetarët mund të hyjnë në këto kampe, sikundër gazetarë e kolegë tuaj të shumë kanaleve të njohura botërisht kanë shkuar dhe kanë arritur të filmojnë deri dhe brenda trupave të ISIS-it, por nuk është e njëjta gjë, përkundrazi është komplet gjë tjetër, për të shkuar dhe për të zhvilluar një operacion tërheqjeje të personave që duhen liruar nga ajo situatë.

Duke shprehur gjithë keqardhjen, dëshiroj ta ndaj me të tërë se e vërteta është kjo dhe së fundmi, situata është edhe më e komplikuar, për shkak  se ju e dini që në atë territor ka një situatë përplasjeje luftarake. Ne do të vazhdojmë të bëjmë punën që kemi bërë dhe siç ju thashë, jemi në koordinim të plotë me partnerët. Ju e patë, besoj, edhe një thirrje që Presidenti i Shteteve të Bashkuara të Amerikës ua bëri vendeve europiane për të tërhequr njerëzit, që do të thotë se asnjë vend deri më sot, përfshirë edhe Italinë fqinjët ku është transmetuar ky emision dramatik, nuk ka bërë tërheqjen e njerëzve, sepse është një operacion vërtetë i komplikuar.

Sidoqoftë, fokusi ynë ka qenë qysh në fillim dhe mbetet tek gratë dhe të miturit dhe në bashkëpunim me partnerët, Shtetet e Bashkuara dhe edhe me autoritetet turke, ne kemi arritur që të grumbullojmë jo pak informacion. Kemi arritur të organizojmë kontakte dhe ka një plan për nxjerrjen e tyre nga kampet, si dhe është përgatitur gjithë infrastruktura e nevojshme për transportimin e tyre. Po ashtu një plan specifik masash për trajtimin e tyre pastaj, këtu në Shqipërisë. Por kini parasysh që  është një zonë ku nuk ka autoritete, prandaj edhe kontaktet janë të ndërmjetme. Transferimi i tyre në kampe me struktura të specializuara është hapi i parë, për të bërë pastaj transferimin përfundimtar.

Besoj që ky shpjegim është i mjaftueshëm, për të nënvizuar faktin se informacioni i dhënë, apo i nënkuptuar, – se unë vetë nuk kam patur mundësi ta shoh emision, – sikur kjo është një çështje vullneti dhe thjesht vënie në veprim nga ana e ambasadës, nuk  është e vërtetë, nuk qëndron.

Kthehemi tek tema e ditës.

Janë bërë përpjekjet maksimale për të arritur të marrim atë që na takon, asgjë më shumë, por atë që kemi merituar dhe këtë nuk e them unë, nuk e themi ne, këtë tanimë e ka thënë jo vetëm me shkrim Komisioni Europian, por e keni dëgjuar vetë të thuhet  nga një pjesë e madhe e kryeministrave të Bashkimit Europian dhe nga vetë Kancelarja e Gjermanisë.

Kam marrë një numër të konsiderueshëm mesazhesh të drejtpërdrejta nga një pjesë e kryeministrave të pranishëm në takim. Kemi qënë në kontakt edhe gjatë ditës së djeshme, edhe në mbrëmje, me disa prej tyre. Kam komunikuar edhe me Presidentin e Francës.

Faktikisht, nëse duam të shikojmë drejt në sy të vërtetën, është ajo që kam thënë prej disa kohësh, duke e parë në të gjitha kontaktet, në të gjitha diskutimet, se procesi po shkonte drejt një përplasjeje qasjesh mes Francës dhe Gjermanisë dhe një pjese të konsiderueshme të frontit që ishte për një “PO” të qartë. Ndërkohë që Gjermania bëri një lëvizje, me shpresën për të patur një pikë kompromisi, duke i vendosur një “POR”, “PO”- së. Në mënyrë të përsëritur në takimet mes Kancelares dhe Presidentit të Francës, që koinciduan edhe me këtë Këshill, kjo çështje është diskutuar dhe nuk ka patur nga ana e tij asnjë hapje. Nuk ka patur asnjë hapje për të gjitha ato që i dëgjuat vetë dhe që ne konferencën e shtypit pas përfundimit të mbledhjes së Këshillit i thanë ndoshta më shkoqur sesa herët e tjera. Unë i kam dëgjuar edhe me shkoqur se aq.

Franca nuk pranon të vazhdohet me te njëjtin proces. Franca kërkon një reformim të brendshëm të Bashkimit Europian dhe kërkon një transformim të vetë procesit të integrimit, madje, deri në pikën që të arrihet një tjetër objektiv për horizontin e integrimit, që do të thotë një ndërveprim me Ballkanin Perëndimor, që nuk mund të zhvillohet sipas Presidentit të Francës me të njëjtën metodë që është zhvilluar procesi i deritanishëm i zgjerimit.

Liderët e Bashkimit të sotëm Europian, që nga Presidenti i Këshillit Europian, tek Presidenti i Komisionit, tek Komisioneri përkatës për Zgjerimin e kanë thënë shumë qartë, sot më shkoqur se asnjëherë tjetër, se kjo që ka ndodhur është një rezultat i mosarritjes të konsensusit mes vendeve anëtare për arsyet e tyre. Natyrisht dëshiroj ta them, është vërtetë e tepërt kur i shtohen bishta kësaj që është thelbësore, jo po azilantët, kjo apo ajo.

Në këtë situatë, jo ne dhe Maqedonia e Veriut, por, sikur të kishte qenë cilido nga vendet që është sot në BE dhe të priste mbrëmë konsensus, nuk do të kishte marrë dot konsensus, për arsye se tema është spostuar gjetkë.

Thënë e gjitha kjo vlen të nënvizohet se kemi marrë një refuzim për t’u marrë në konsideratë për çeljen e negociatave mbrëmë, por nuk kemi marrë asgjë më shumë se kaq. Rruga jonë është e njëjtë, pa asnjë ndryshim, sepse ato qe ne kemi bërë deri tani dhe që do të vazhdojmë t’i bëjmë, i kemi bërë dhe do të vazhdojmë t’i bëjmë për vendin tonë. Nëse kemi bërë një reformë në drejtësi që vazhdon, natyrisht kemi bërë një reformë, e cila nuk i është kërkuar fare disa prej vendeve që kanë hyrë në Bashkimin Europian, jo përpara se të çelen negociatat, por as kur kanë qenë në përfundim të tyre. E kemi bërë sepse është gjëja e duhur për ne, është gjëja e duhur për popullin dhe  për vendin tonë.

Ashtu sikundër do të vazhdojmë po njësoj me plotësimin e parakushteve, të  vendosura në votën “PO” të Bundestagut, për reformën zgjedhore sipas rekomandimeve të OSBE/ODIHR-it dhe natyrisht, në pritje të plotësimit të Gjykatës Kushtetuese. Do të vazhdojmë më pas me pjesën tjetër që ka të bëjë pikë për pikë, me kërkesa të lidhura me funksionimin më të mirë të shtetit dhe të sistemit tonë të institucioneve. Jo sepse e ka kërkuar Gjermania dhe s’ka absolutisht asnjë lidhje, ajo që do të ndodhë në muajt në vijim, apo që do të ndodhë para Samitit të Zagrebit, me “do t’i bëjmë, apo s’do t’i bëjmë”. Do t’i bëjmë këto dhe të gjitha të tjerat, pa ndryshuar asgjë.

Kjo është një përplasje mes të mëdhenjve dhe është një “lojë” qasjesh dhe interesash që është shumë më e madhe sesa ne, qoftë ne si Shqipëri, qoftë ne si rajon. Nga ana tjetër, askush nuk e ka përjashtuar dhe nuk e përjashton perspektivën e integrimit tonë si rajon dhe si vende në Bashkimin Europian.

Në fund të fundit, – e kam thënë gjithmonë dhe është dita për ta përsëritur edhe më fort, – se procesi i integrimit është një proces transformimi të brendshëm, nuk është një proces për t’ju pëlqyer të  tjerëve. Një transformim i brendshëm që përputh legjislacionin, përputh sistemin e funksionimit të institucioneve me legjislacionin e sistemit të funksionimit të kësaj familjeje të madhe në funksion të njerëzve tanë.

Dua ta vë theksin shumë qartë tek fakti se ndërkohë që ata, të cilët janë jashtë nesh, ata të cilët përfaqësojnë BE-në, e thënë pa ekuivok, që me mosarritjen e vendimit të djeshëm përgjegjësia është e brendshme e BE-së, është e papranueshme dhe e pajustifikueshme që këtu mes veti fillon e shtrohet diskutimi sikur mosvendimi i djeshëm vjen si pasojë e mospërmbushjes së detyrave.

Ne  i kemi përmbushur detyrat jo njëherë, po dy herë rresht. Po të shikoni vendimin e qershorit, ata kanë thënë që do ta marrin këtë vendim në tetor, as më shpejtë,  as më vonë. Ka një formulim aty që lë të kuptohet se do të merrej vendimi që pritej dje. E prej kohësh, sa herë kam folur, kam vendosur një pikëpyetje, pikërisht sepse e kam parë qartë që ka një mospërputhje që do të shkojë në konflikt.

Dje konflikti është shpalosur plotësisht.

Kryeministri italian e quajti gabim historik këtë që u bë sot.

Është në funksion të një qasjeje tjetër, që është qasja e shumicës dërrmuese të vendeve. Nga ana tjetër nuk mund të mos shtoj po ashtu që Franca është një nga themeluesit e shtëpisë së përbashkët europiane. Është në të drejtën dhe në legjitimitetin e vet që të kërkojë ndryshimin e rregullave brenda një shtëpie që, siç e dëgjuat Presidentin e Francës sot, nuk funksionon.

Thënë të gjitha këto, nga ana jonë, ajo që mbetet esenciale është që ne të vazhdojmë rrugën që kemi nisur. Të vazhdojmë përpjekjet që kemi bërë, bëjmë dhe do të bëjmë dhe të vazhdojmë ndërtimin e Shqipërisë europiane këtu në vendin tonë, sepse për këtë është i gjithë procesi. E pastaj përputhja e qasjeve është një çështje më e madhe se ne dhe natyrisht që ndikimi ynë në këtë është minimal, për të mos  thënë zero.

Ama, nëse një  pjesë të vendeve i kemi pasur gjithmonë mbështetje për shkak të qasjes së tyre dhe asnjëherë nuk janë lëkundur në mbështetjen  për të hapur negociatat pa kushte, Austria, Italia dhe të tjera, me forcën e diplomacisë dhe me përpjekën tonë kemi kthyer Gjermaninë, që në qershor, mbas gjithë atyre që ndodhën, nuk e kishim pozicionin që e kemi pasur gjatë gjithë kësaj kohe dhe veçanërisht mbrëmë. Kancelarja ka bërë gjithçka për të arritur një formulë kompromisi dhe për të mos lejuar që Këshilli të përfundonte pa tekst. Nuk ka tekst. S’ka asgjë të shkruar, zero. Është diçka e rrallë që ndodh. Nuk ka gjë të shkruar, sepse nuk ka pikë takimi. Është një përplasje e madhe për të nesërmen e Bashkimit Europain.

Kemi pasur një problem të madh gjatë gjithë 6-mujorit të parë, për shkak të gjithë asaj që u bë këtu, për të dëmtuar procesin dhe për të hedhur hije deri  në pikën që të refuzohej çelja e negociatave, me partinë kryesore në koalicion CDU-në dhe me CSU-në , dy partitë që janë shtylla e koalicionit. I kemi kapërcyer me diplomaci dhe me komunikim të vazhdueshëm dhe me gjuhën e fakteve, të shifrave  dhe të vërtetave tona dhe kemi marrë mbështetje prej shumicës së tyre, që nga Zoti Wadephul, të cilin e kam  falënderuar posaçërisht, siç kam falënderuar posaçërisht Kancelaren sot paradite, deri tek një pjesë e rëndësishme njerëzish në këtë Parlament, që jo se kishin gjë kundër Shqipërisë, por që ishin shumë më skeptikë se pjesa tjetër.

Tani çka na mbetet është të vazhdojmë sepse s’ka asnjë alternativa tjetër dhe Shqipëria europiane nuk është njëri nga planet. Është e vetmja alternativë. Shqipëria europiane është testament në këtë vend dhe është detyrimi i vetëm, i madh dhe i patjetërsueshëm që ne i kemi gjeneratave të tjera.

NEWS 24; Zoti Kryeministër, ju thatë që duhet të ecim përpara. Por në këto kushte, kur Këshilli i Europian për të tretën herë radhazi refuzoi të jepte vendimin për çeljen e negociatave, a mendoni që për të sqaruar pozicionin tuaj politik, lidhur edhe me atë oponencën që ju sapo e thatë, i është bërë brenda Shqipërisë, duhet t’i kërkoni Parlamentit një mocion besimi, ndoshta mocion besimi edhe në popull?

Kryeministri Rama: Mund t’ia kërkoj Parlamentit francez, por Parlamentit shqiptar nuk shoh për çfarë t’ia kërkoj. Parlamentit francez nuk ia kërkoj dot, sepse nuk ka lidhje me mua dhe me ne. E përsëris, Maqedonia ka 14 vjet që pret të çelë negociatat, në mos gabohem. Ka 14 vjet që nga Këshilli në Këshill merr sinjale pozitive dhe s’merr asnjëherë “PO”-në. E detyruar të ndërrojë emrin, të ndërrojë identitetin, në kuptimin e Kartës së Identitetit, pra, të emrit, duke iu premtuar që u bë kjo, u zgjidh. Dhe ja ku jemi. Kishte plot që thoshin do ndahet Shqipëria nga Maqedonia e Veriut, se Shqipëria kështu, Shqipëria ashtu, nga këta këtu, por kishte edhe zëra nga brenda familjes europiane. Asnjëherë nuk ka qenë një opsion. E kemi rrezikuar në maj-qershor për shkak të katrahurave që u bënë këtu, por asnjëherë s’ka qenë një opsion strategjik, sepse nuk ka lidhje, në thelb, vendimmarrja apo mosvendimmarrja me çfarë ka bërë njeri e çfarë ka bërë… Ata ndërruan emrin dhe përfytyroni, të ndërrosh emrin e vendit tënd dhe të mos arrish dot të mbarësh “PO”-në. Atëherë,  çfarë duhet të bënin më shumë ata? Asgjë s’duhet të bënin më shumë dhe asgjë s’mund të bënin më shumë. Por u gjendën në një moment të historisë së bashkëjetesës brenda Bashkimit Europain ku ndodh një përplasje.

Është një përplasje e madhe konceptuale mes Francës dhe Gjermanisë dhe nuk është thjesht për zgjerimin, por edhe për elementë të tjerë të mënyrës së funksionimit  të Bashkimit Europian, për të cilat ne jemi më pak të vëmendshëm, sepse fokusi ynë është me të drejtë tek pjesa jonë. Mekanizmi është i tillë që mund të jenë dakord të gjithë, mjafton që njëri të thotë Jo dhe është Jo.

Dëgjova Kryeministrin   e Holandës. Ai tha se Shqipëria ka bërë progres të madh, por nuk ka bërë mjaftueshëm. Mjaftueshëm në raport me çfarë? Sepse, nëse e konsiderojmë progresin, si një progres lidhur me gatishmërinë e Shqipërisë për t’u bërë anëtare e Bashkimit Europian, patjetër që është krejt i pamjaftueshëm. Por, nëse e krahasojmë me çfarë na është kërkuar në radhë të parë dhe çfarë kemi bërë, me çfarë u është kërkuar dhe çfarë kanë bërë vendet e tjera që sot janë në Bashkimin Europian, në kohën kur negocionin përpara nesh, është shumë më tepër sesa ato, jo sepse ne jemi më të zotë, por sepse procesi ka ardhur duke u bërë gjithmonë e më i vështirë, gjithmonë e më kërkues. E nëse ne e bëjmë këtë, nuk kemi asnjë pendesë, sepse e bëjmë për veten tonë. Do vazhdojmë të bëjmë edhe më shumë, sepse  na duhet për vendin tonë. Por, në momentin kur i ke vënë barrikadën procesit, duke ngritur çështjen e funksionimit të Bashkimit Europian dhe duke ngritur shqetësimin se kështu nuk vazhdohet më, shtimi i bishtave nuk është korrekt.

Mbrëmë, cilido nga vendet që kanë hyrë në Bashkimin Europian mbas rënies  së komunizmit të ishte në vendin tonë, nuk e merrte “PO”-në. Sepse tema ishte gjetkë, çfarë do të bëjmë me shtëpinë tonë, me rregullat, me mënyrën e funksionit etj.. Presidenti i Francës në konferencë ishte brutalisht i hapur në atë që tha. Ka qenë më i hapur sesa çdo herë tjetër në publik, ndërkohë që janë tema që në takime, ai i trajton rregullisht. Vuri në pikëpyetje gjithë metodologjinë  e negociatave, vuri në pikëpyetje gjithë procesin, duke kërkuar ndryshimin e këtij procesi, jo duke kërkuar që të përjashtohemi ne nga Europa. Por duke kërkuar ndryshimin e këtij procesi, sipas tij, për ta bërë më efektiv për Bashkimin Europian dhe për vetë vendet që negociojnë. E quajti një proces ultraburokratik dhe kërkon një ndryshim metodologjie. Është absolutisht në të drejtën e tij dhe nuk është se mund të thuash që e ka gabim për atë se si e shtron dhe për qëllimet që ka.

Po ku hyjmë ne në këtë mes?

TV KLAN; Në fakt gjysmën e pyetjes Zoti Kryeministër ma dogjët me përgjigjen që dhatë për Holandën. Gjithsesi po e bëj si pyetje. Parashtruat qëndrimin e Francës që kërkon reformim të brendshëm, edhe Holandën, siç e thatë. A kërkon një analizë edhe vota e Danimarkës që ishte edhe ajo kundër çeljes së negociatave, që gjithsesi dhe ajo ka votën e saj dhe mund të vendosë veton.

Pyetja  e dytë; Ju folët për mesazhe të shumta që kemi marrë nga liderë europianë, por keni pas komunikime me liderë rajonalë, me çfarë kemi mundur të shohim. A keni pasur një komunikim me Kryeministrin e ardhshëm të Kosovës, Albin Kurtin dhe a janë marrëdhënie të ndera këto mes jush dhe mund të rrezikojnë të ardhshmen e marrëdhënieve mes dy vendeve?

Dhe më lejoni ju lutem edhe një pyetje të fundit; Ju folët për atë që do ndodhë pas ditës së sotme, përveçse do të lindë dielli, do të vazhdojnë të ngrihen dhe institucionet e reja kushtetuese, do të plotësohet dhe Gjykata Kushtetuese. Si e vlerësoni ju vullnetin e Presidentit të Republikës, i cili ka dekretuar një anëtar të Gjykatës Kushtetuese pa pritur madje, edhe vlerësimin përfundimtar të Kolegjit të Apelimit? Faleminderit!

Kryeministri Rama: Do më mirëkuptoni që në 48 orët e fundit s’kam pasur asnjë sekondë për Ilir Metën.

Ndërkohë, përsa i përket Danimarkës, është e vërtetë. Unë e kam takuar Kryeministren daneze dje. Dje i bie, se u bëmë lëmsh tashmë me kohën. E kam dëgjaur fjalimin e saj në tryezën e kryeministrave të Bashkimit Europian që vijnë nga Partia Socialiste Europiane. Fjalia e saj ka qenë e drejtpërdrejtë dhe e thjeshtë: Nuk jemi të gatshëm për një raund tjetër zgjerimi.

Gjatë gjithë kohës e kemi bërë këtë  përpjekje. Sot, për herë të parë e dëgjova nga Presidenti i Francës në një pasazh, se herë tjetër asnjëherë nuk e ka thënë, nuk ka dëshiruar ta thotë, që ne nuk po kërkojmë të bëhemi anëtarë të Bashkimit Europian sot. Ne po kërkojmë të hyjmë në një fazë tjetër të procesit. E kjo fazë tjetër e procesit është një fazë ku transferohet dija e Bashkimit Euopian, lidhur me të gjithë ata kapituj që ka negocimi dhe përmes atyre kapitujve duhet të arrish të përputhësh legjislacionin dhe standardet e institucioneve, që të bëhesh gati për t’u anëtarësuar.

Asnjëherë nuk kam dashur ta pranoj, edhe pse e kuptoj pse e bëjnë, që të flitet në këtë lidhjen e shkurtër. Kjo lidhje e shkurtër është për politikë të brendshme. Sot, Presidenti i Francës e tha, është e qartë, tha, që çelja e këtij procesi nuk nënkupton anëtarësim. Unë kam një bisedë tjetër me të dhe mbase nuk gaboj nëse mendoj që aty mbase ka një pikënisje të një bisede mes nesh, për të kuptuar çfarë vjen mbrapa. Sepse pashë një prononcim të ministrit të Jashtëm të Maqedonisë së Veriut, është gjëja që unë e kam përsëritur vijimësisht me ta. E thashë dje, edhe në tryezë, kur mora fjalën, se më qëlloi ashtu radha, pas Kryeministrit të Danimarkës, nëse doni të mbyllni procesin e zgjerimit, thuajeni. Jeni ju që e vendosni, jeni ju që jeni pjesë e asaj familjeje, thuajeni. Por nuk mund të vazhdoni t’i thoni vendeve bëj këtë dhe këtë dhe po i bëre këto, do ta marrësh këtë. Pastaj vjen dita e thonë jo se kemi zgjedhjet europiane. Unë s’e kam thënë kaq copë, po e them sot, prit se kemi zgjedhjet europiane dhe nuk e duam Shqipërinë të na futet në debatin elektoral këtu apo atje. Bashkimi Europian janë 28 vende, – 27 mbase bëhen pas të shtunës, – 28 palë zgjedhje politike, 28 palë zgjedhje lokale, 28 palë europiane. Si mund të jetë ky proces i lidhur? Por s’ke çfarë i bën… Një vend tentonte të shtonte ca kushte pa lidhje. Flas me Kryeministrin dhe e pyes çfarë është kjo? Kemi zgjedhje, tha.

Kështu që duhet kuptuar, të gjitha këto që po them, nuk janë as për t’i… jo fajësuar, por as për t’i bërë me çfarëdolloj përgjegjësie, janë normale, është një familje politike. Nëse Komisioni Europian do të thoshte që Shqipëria nuk i ka kryer detyrat, se Komisionin Europian paguan Bashkimin Europian për të bërë verifikimin e kryerjes së detyrave. E kam thënë në mënyrë të përsëritur, e thashë edhe dje dhe ia kam thënë vijimësisht edhe Presidentit të Francës, edhe Kryeministrit të Holandës, edhe Kryeministres daneze, keni në vendet tuaja ndonjë zyrë që merret gjithë javën, pa pushim, vetëm me Shqipërinë dhe që i di gjërat në Shqipëri, që i ndjek proceset në Shqipëri dhe që i verifikon rezultatet në Shqipëri, siç bën gjithë ajo zyrë këtu, që është zyra e Delegacionit Europian? Nuk e keni. Atëherë, si dilka që ky Komision që e paguani ju, nuk e paguan Shqipëria dhe që është vërtetë shumë skrupuloz në çdo verifikim e në çdo raport nuk i dika të gjitha. Është e kuptueshme që nga niveli teknik shkohet në nivelin politik. Megjithatë, nëse dje apo sot, një vend i vetëm të kishte thënë ka dështuar qeveria e Shqipërisë, qeveria e Shqipërisë nuk ka bërë reforma, qeveria e Shqipërisë nuk ka bërë progres, atëherë mbase do të mund ta diskutonim këtë si një rezultat që lidhet dhe me ne. Mbi të gjitha, është më skrupuloze Danimarka, Holanda apo Franca sesa Gjermania, Suedia Finlanda, Austria, në raport me krimin, në raport me korrupsionin, në raport me çfarëdo teme? Jo, kanë të njëjtat standarde. Dikush  e vë theksin më shumë, dikosh e vë më pak, dikush bën më pak politikë të brendshme me lëkurën tonë, dikush bën më shumë politikë të brendshme me lëkurën tonë, është në të drejtën e  vet. Kjo është politike e brendshme e tyre, nuk është e lidhur drejtpërdrejtë me ne.

Thënë gjitha këto, nuk po them se ne jemi Zvicra se, nëse Zvicra do kishte bërë dje kërkesë për të hyrë në Bashkimin Europian, mbase – nuk jam i sigurt, – do thoshin po biem dakord. Por i thua një vendi ndërro emrin dhe çfarë po i jep? Çeljen e negociatave, nuk po i jep anëtarësimin. Procesi i çeljes së negociatave është një proces natyrisht energjizimi, një proces rëndimi të detyrave dhe monitorimi, është procesi i transferimit të dijes në shtetbërje dhe për këtë, ne kemi kërkuar dhe do vazhdojmë ta kërkojmë me insistim. Si do të ndryshojë metodologjia, se çfarë forme do marri procesi, për ne është një rrugë e domosdoshme për të bërë shtetin këtu.

Përsa i përket Albin Kurtit, në dijeninë time do të takohemi në ditët në vijim, ka kërkuar të më takojë. E pres me shumë kënaqësi. E kam ndjekur në prononcimet e tij. Bie dakord me të që ka një nevojë për një shtysë të re në raport me marrëdhënien mes dy qeverive dhe në raport me marrëveshjet e bëra. Mendoj që duhet të shkojmë përtej marrëveshjeve të bëra dhe shpresoj që me qeverinë e re të mund të plotësojmë boshllëqet që u krijuan me qeverinë e mëparshme, e cila, faktikisht, në këtë fushë nuk arriti të bëjë shumë. Kam edhe disa propozime të reja, që do t’ia bëj atij dhe besoj se për ta shtyrë këtë bashkëpunim më thellë, është momenti për të konsideruar vendosjen e një ministri Shteti në dy anët, ministri i Shtetit për Bashkëpunimin me Kosovën nga Shqipëria dhe ministri i  Shtetit  për Bashkëpunimin me Shqipërinë nga Kosova dhe për të patur një pikë referimi institucional që merret çdo ditë me procesin e bashkëpunimit, me ndjekjen e marrëveshjeve dhe me gjithë çfarë mendoj se duhet bërë më tutje dhe ka shumë për të bërë. Natyrisht që me shumë kënaqësi do të dëgjoj idetë e freskëta të Albinit, tani që shpresoj dhe besoj që, nëse s’do ketë ndonjë  çudi, por nuk ma ha mendja, do të marrë përgjegjësinë dhe do kalojë nga poezia e opozitës në prozën e qeverisjes.

TOP CHANNEL; Zoti Kryeministër, populli shqiptar ka një shprehje që thotë “një fshat që duket nuk ka nevojë për kallauz”. Ne e pamë se çfarë ndodhi në Europë dhe perspektiva për t’ju bashkuar kësaj familjeje bëhet e largët, jo nga dëshira jonë, po nga faktorët e brendshëm që ju sapo na i thatë dhe theksuat. Do doja të dija mendimin tuaj, nëse do të ishte e udhës që kaq energji dhe kaq mund që ne jemi duke shpenzuar drejt Europës, a do ishte më e mirë të kanalizoheshin në forcimin e kombit shqiptar, për mos të thënë ndonjë term tjetër.

Pyetja e dytë; Si do të vijojë projekti i Shengenit Ballkanik dhe kur Kryeministri i ardhshëm i Kosovës do jetë në të njëjtën tavolinë me kryeministrat e tjerë të rajonit. Faleminderit!

Kryeministri Rama: Kjo e dyta do të varet nga qeveria në Kosovë, kur do krijohet qeveria. Takimi i radhës është në 10 nëntor në Ohër. Nuk e di, a do të krijohet dot qeveria deri në 10 nëntor, por në prononcimin e tij, Albini ka qenë shumë i qartë që me rëndësi është që Kosova të jetë në të gjitha këto formate dhe në të gjitha këto tryeza e  padiskutim që është jo thjesht e mirëpritur, por e ftuar. Në takimin e Novisadit dhe këtë do ta përsëris sepse vazhdoj të dëgjoj u firmos marrëveshja, nuk është firmosur asnjë marrëveshje, është bërë një deklaratë e përbashkët dhe është dakordësuar një nismë, e bazuar  mbi të katër liritë e Bashkimit Europian, liria e lëvizjes së njerëzve, liria e lëvizjes së mallrave, liria e lëvizjes së shërbimeve dhe liria e lëvizjes kapitale, për të patur këto katër liri në këtë zonë të rajonit tonë. Në këtë aspekt, nisma jo vetëm nuk është ekskluzive, por s’mund të jetë ekskluzive, por është gjithëpërfshirëse. Do të ishte gabimi më i madh që ne këtë moment, kur prisnim të merrnim një “PO” për çeljen e negociatave dhe nuk e morëm dot, ta përjetojmë si një moment kur duhet vënë pikëpyetje Europën dhe të ardhmen tonë europiane dhe t’i referohemi adresave të gabuara të së shkuarës. Rrugëtimi ynë europian, e përsëris, është një testament. Europa ka patur momentet e veta të lavdishme, ka patur momentet e veta të vështira, ka një moment të komplikuar sot, por është i vetmi destinacion. Forma që ajo do të marrë, nëse do të marrë një formë tjetër si organizim, është dytësore në raport me përkatësinë ndaj kësaj familjeje dhe kjo nuk ka të bëj me Merkel-in, me Macron-in, apo me emrat e përveçëm të atyre që udhëheqin sot Europën, apo të vendeve që e përbëjnë sot, Bashkimin Europian. Kjo ka të bëj me Shqipërinë dhe shqiptarët. Ankorimi i shqiptarëve në këtë organizëm politik të vendeve europianë është destinacion strategjik dhe historik. Nuk është një nga planet, është i vetmi plan, sepse është e vetmja hapësirë ku shqiptarët mund të jetojnë njëherë e përgjithmonë, jo thjesht të lirë, por edhe të sigurt.

TV ORA; Zoti Kryeministër, pas mbledhjes së Këshillit Europian, Presidenti francez Emanuel Macron deklaroi se ka pasur opinione që duhet të ndaheshin Shqipëria nga Maqedonia e Veriut, pasi shumë vende e kanë qenë  pro Maqedonisë së Veriut, por jo për Shqipërinë. Sipas Macron-it, ai ka vendosur votën e tij kundër, pasi nuk donte të vendoste kufi mes shqiptarëve. Mendoni që Maqedonia e Veriut e ka merituar më shumë se Shqipëria hapjen e negociatave dhe a është sakrifikuar Maqedonia   e Veriut për Shqipërinë. Pyetja e dytë; Presidenti Macron tha që kryeministrat Rama dhe Zaev duhet të bëjnë më shumë reforma, duhet të bëjnë reforma të thella, pastaj të vijnë tek ne dhe ndoshta mund të negociojmë disa gjëra, por nuk do të ketë hapje të plotë të negociatave. Faleminderit!

Kryeministri Rama: Edhe Presidenti Macron duhet të bëjë më shumë, me thënë të drejtën, edhe ai vetë thotë që dua të bëj më shumë, kështu që, në këtë pozicion ku jemi, të gjithë duhet të bëjmë më shumë. Një gjë është e sigurt, që ne kemi bërë gjithçka që Presidenti Macron dhe të gjithë të tjerët, dje të thoshin “PO” për të çelur negociatat. Nëse nuk e thanë, kjo nuk ka të bëjë me ne dhe bishtat që shtohen mbrapa nuk janë korrekte, sepse qëndrimi i Presidentit në raport me temën e djeshme është një qëndrim konceptual kundër mënyrës si funksionon sot Bashkimi Europian. Edhe kundërshtia e tij ndaj disa vendeve, jo shumica e vende, që në një moment të caktuar kanë menduar që mos e çajmë këtë punë duke i ndarë, nuk është një qëndrim i rastësishëm. Është një qëndrim koherent me konceptin e tij që duhet të ndryshojë Europa. Ne jemi sot në një moment që është historik për ne, është historik edhe për Europën dhe ku këto dy gjëra nuk përputhen. Është një moment i përkohshëm, nuk është moment i përjetshëm.

Asnjëherë Gjermania nuk ka dashur ndarjen. Gjermania është Gjermania dhe asnjëherë nuk ka dashur ndarje. Me një pozicion qartësisht strategjik dhe debati i madh që është bërë në gjirin e koalicionit është prodhuar nga 6 muaj historia këtu, për të sfazuar procesin, duke bërë ndarjen dhe Kancelarja ka vënë veton për këtë punë; Ndarje kurrë. Kështu që predikimi që Maqedonia e Veriut e paska pësuar nga Shqipëria është një tjetër predikim i lodhur i atyre që bënë çmos për ta penguar këtë proces, bënë çmos për ta sakatuar Shqipërinë në sytë e atyre që vendosën, apo nuk vendosën dje dhe pastaj i të tjerëve rreth e rrotull, që në mënyrë të përciptë kapen pas këtyre argumenteve.

Jo, nuk është e vërtetë.

E vërteta është që Shqipëria ka shumë për të bërë, nuk diskutohet. Askush nuk e ka shtruar si pyetje këtë, por pyetja që bëhet në raport me këtë vendimmarrje është, a i ka bërë Shqipëria të gjitha ato që duhet të bënte për çeljen  e negociatave. Unë po ju them që Shqipëria ka bërë më shumë se çdo vend tjetër më parë përpara çeljes së negociatave, jo sepse Shqipëria është më e zonja sesa ato të tjerat, por sepse Shqipërisë i është kërkuar shumë më tepër, ngaqë procesi ka ardhur duke u vështirësuar. Po të ktheheni  mbrapa në kohë, procesi për çdo vend të ri që ka ecur në këtë rrugë ka ardhur duke u vështirësuar.

Por këto tema që kemi ne sot, në rendin e ditës; – tema e Reformës në Drejtësi, që ne e kemi çuar përtej të gjitha kornizave të paravendosura për të tjerët më parë; Bilanci solid në luftën kundër krimit të organizuar dhe korrupsionit, për vende të tjera që kanë hyrë në BE kanë qenë në fund të negociatave; – Neve na kanë ardhur përpara, jo për një arsye tjetër, por sepse metodologjia është ndryshuar në proces.

Edhe ajo që thotë Presidenti i Francës, që duhet të ketë kthyeshmëri në proces. Procesi e ka kthyeshmërinë edhe sot që flasim. Në çdo moment, Këshilli Europian mund ta kthejë mbrapa procesin, në çdo moment mund ta bllokojë. Mjafton një vend të thotë “stop” nuk dua më të jap votën për të hapur kapituj të tjerë me këtë apo atë vend për arsye të caktuara dhe ka ndodhur.

Të jemi realistë, ajo që ne duhet të kuptojmë nga ky proces është se kemi hyrë në një fazë tjetër ku “loja” e interesave është shumë më e madhe. Nuk jemi më  në fazën kur mjaftonin ca marrëveshje dhe disa vendime me një peshë relative. Jemi në fazën kur në Bashkimi Europian ka një debat shumë të madh dhe ne po kërkojmë të hymë në një shkallë tjetër.

Është shumë e rëndësishme gjithashtu që të kuptohet se një pjesë të konsiderueshme të bishtave i kemi prodhuar ne vetë, këtu. 

Diskutimi për të gjithë ato detaje është krejt legjitim, ama,  gjithmonë të kthehemi  tek një pikë. Çfarë po kërkojmë ne sot?

Ne nuk po kërkojmë të bëhemi anëtarë të Bashkimit Europian. Është si çështja e Gjykatës Kushtetuese. Gjykata Kushtetuese u fshi nga vetting-u. Ky është sukses, funksionoi reforma, funksionoi vetting-u. Ky nuk është dështim, se ne nuk e morëm Gjykatën Kushtetuese ta fshimë me ndonjë mekanizëm antiligjor, apo me ndonjë dekret qeverie. Jo, u fshi nga vetting-u. Natyrisht që për të shkuar më tutje duhet Gjykata Kushtetuese, sepse hymë në një fazë tjetër, por për këtë fazë, ky është një sukses dhe këtë nuk e them më vetëm unë, këtë e ka thënë shprehimisht Kancelarja gjermane; Për këtë fazë, kjo është sukses, në fazën e mëtejshme, Gjykata Kushtetuese duhet plotësuar sepse nuk shkohet më  tutje në proces.

Syri TV; Zoti Kryeministër ndiheni përgjegjës për faktin se shqiptarët janë të dytët në listë për azilkërkim në Francë dhe në bazë të një raporti të Eurostat, të publikuar disa ditë më parë, Shqipëria ishte i vetmi vend në rajon i renditur mes 30 vendeve në botë që kishin numrin më të lartë të azilkërkuesve.

Pyetja e dytë; Nuk pati një ndarje të Shqipërisë dhe Maqedonisë së Veriut përsa i përket vendimit për çeljen e negociatave, por  a do të ketë një ndarje morale, në rast se Zoran Zaev e mban fjalën e tij që dha përpara këtij vendimi dhe jep dorëheqjen nga posti i Kryeministrit të Maqedonisë së Veriut? Faleminderit!

Kryeministri Rama: Faleminderit për pyetjen e parë. Dje pata një bisedë, ndër të tjera, me Kryeministrin e Portugalisë. Portugalia është vendi që vitin e shkuar ka regjistruar një ndër rritjet më të larta ekomomike në Bashkimin Europian, mos gabohem. Portugalia është vendi ky Kryeministri u rikonfirmua para pak kohësh me një rezultat spektakolar. 50 mijë vetë kanë ikur nga Portugalia në vitin e suksesit më të lartë ekonomik. 50 mijë persona dhe nuk e di sesa në vitet e fundit, Portugalia ka humbur 500 mijë burime njerëzore. Portugalia, sot  ka vendosur një bonus 6500 euro për dikë  që do të kthehet në Portugali dhe nuk po funksionin. Shumë e thjeshtë, bota ka ndryshuar. Nuk është më bota e përpara qoftë edhe 10 viteve, edhe pse lëvizja e shqiptarëve nuk ka ndryshuar nëse i referohemi shifrave. Nëse i referohemi dëshirave,, apo nevojave të propagandës është temë tjetër.

Italia sot ka një nga një sistemet shëndetësore më të suksesshme në botë, sidomos në Italinë e Veriut. Italia, sot ka një problem real për mjekë në spitale. Në spitalet e Jugut të Italisë  ka mungesë mjekësh, sepse ikin. Shkojnë në Gjermani, në Britaninë e Madhe, në Europën Veriore.

Kroacia është vend i Bashkimit Europian. Vitin e kaluar 100 mijë kroatë janë regjistruar në zyrat e punës në Republikën Federale të Gjermanisë. Të gjithë këta, çfarë ndryshimi kanë nga shqiptarët? Janë qytetarë të tregut të përbashkët europian dhe nuk kanë nevojë të shkojnë të kërkojnë azil për arsye ekonomike. Lëvizin, marrin makinën në mëngjes tek shtëpia dhe e ndalojnë në darkë në një shtet tjetër dhe të nesërmen shkojnë regjistrohen në zyrën e punës.

Nuk janë fare këto që flasim tema specifike për Shqipërinë. Shqiptarët është e vërtetë, janë në një numër më të madh, por jo një numër që po trondit Francën, të jemi të qartë për këtë. Gjermania është destinacioni i parë më i preferuar. Pse në Gjermani, azilkërkuesit shqiptarë, të cilët të gjitha janë për arsye ekonomike, këtë besoj se e kemi të gjithë të qartë, kanë rënë në mënyrë drastike dhe janë rritur në Francë?

Për arsye se Gjermania, kur ky problem u paraqit, gjatë gjithë bisedave që ne bëmë, ishte ndryshimi i regjimit të azilit. Gjermania e ndryshoi regjimin e azilit dhe spostohen në Francë, sepse Franca ka një regjim azili shumë më të avashtë. Duhet një vit, minimumi, që të marrësh përgjigje. Gjatë atij viti, çdo muaj merr para. Këta njerëz, unë jo nuk i gjykoj, por, përkundrazi, mendoj se këta njerëz nuk gjykohen dhe ky është një fenomen që nuk mund të luftohet se po ia kërkon qeverisë shqiptare. Ne kemi bërë maksimumin për këtë dhe jemi në bashkëpunim me Francën dhe shifrat kanë rënë në krahasim me të kaluarën. Ministri i Brendshëm i Francës, që dha dorëheqjen më pas për arsye të tjera, i cili ishte kundërshtari më i madh i “PO”-së për negociatat vitin e kaluar  dhe që ka ardhur në Shqipëri e më tha  këtu në këtë sallë, nëse ju do bëni atë që thoni, unë do shkoj te Presidenti e t’i kërkoj çeljen e negociatave. Nga kundërshtari më i madh, ai u  kthye në avokatin tonë për të çelur negociata dhe ai ka qenë i pari që më ka thënë kjo nuk është një çështje thjesht dhe vetëm e asaj që bëni ju, por Presidenti ka një qasje tjetër ndaj të tërës.

Kështu që për çfarë po diskutojmë, për politikë? Është kollaj fare, hajde ia lëmë qeverisë se shqiptarët po lëvizin, ikin dhe vinë. Shikoni studimin e bërë nga Tim Judah, botuar përpara pak ditësh, shikoni shifrat e shqiptarëve dhe të të tjerëve si janë. Nuk jemi as në majë, as në fund. Shqiptarët kanë lëvizur gjithmonë. I mbylli Enver Hoxha të gjithë për 50 vite brenda. Ikin, kanë ikur, do vijnë. Kjo është bota që jetojmë sot. Problemi ynë është që, duke qenë jashtë tregut të përbashkët, detyrohemi të ndjekim këtë rrugë. Sot që flasim, ata që shkojnë për azil në Francë, në pjesën më të madhe nuk lëvizin më nga Tirana, sepse këtu kontrollet janë bërë shumë të forta, por lëvizin nga të tjera aeroporte në rajon. Kjo të kërkon një koordinim për t’i hequr nga duart e trafikantëve.

Është jo korrekte, siç është jo korrekte që shqiptarët të bëhen shënjestër në një vend tjetër, që janë mishëruesit e të gjitha të zezave, për politikë të brendshme dhe ato bishtat që dëgjoni ju nëpër konferencat e shtypit të sotme janë për t’i dëgjuar ata atje.

E dëgjuat Presidentin e Francës, e tha vetë: Si tua shpjegoj unë francezëve këtë gjë? E tha në frëngjisht dhe francezët ishin duke dëgjuar. Kjo është e vërteta. Por të gjitha këto janë normale. Nuk ka asnjë gjë jonormale. Unë nuk kam asnjë qëllim që të fajësoj askënd. Janë të gjithë në të drejtën e tyre që të mbrojnë interesat e tyre dhe të bëjnë atë që ju duket më e mira për vendin e tyre, por dhe atë që ju duket më e mira për fushatën e tyre. Të të thonë bëj këtë dhe këtë” se do të hapësh negociatat, dhe pastaj prit se kam zgjedhjet europiane, kjo do të thotë prit njëherë ti, se unë kam një interes tjetër. E pastaj shto ujë dhe shto miell. Por me këtë “shto ujë dhe shto miell” mund të vazhdosh… Asnjëherë, asnjë vend nuk  mund të jetë në perfeksion. Në Bashkimin Europian që është sot, gjysma e vendeve që kanë hyrë, nuk do të hynin kurrë. Por është e përkohshme, nuk është e përjetshme.

Zoti Kryeministër, sa shanse ka që Shqipëria deri në fillim të vitit 2020, kur do të diskutohet edhe zgjerimi i BE-së, t’ia ketë dalë të ketë një Gjykatë Kushtetuese dhe të ketë realizuar Reformën Zgjedhore? Marrja e një përgjigje negative nga BE-ja  për PD është një dështim i juaji personal. A ndiheni përgjegjës, Zoti Kryeministër?

Kryeministri Rama: Është absolutisht e vërtetë që është përgjegjësia ime pse Franca dhe Gjermania kanë dy qasje të ndryshme për të ardhmen e Bashkmit Europian. Nuk kam arritur dot t’i bëj bashkë dhe t’i bind se cila është rruga e duhur që të jenë në harmoni me njëri-tjetrin. Është përgjegjësia ime pse zhvillohen zgjedhje europiane, në të njëjtën kohë kur duhet marrë një vendim dhe shtyhet vendimi. Është përgjegjësia ime pse shumica dërrmuese e vendeve, duke filluar nga Gjermania, thonë “PO”, ndërkohë që Franca dhe dy vende të tjera, për arsyet e tyre thonë “JO”. Këto të gjitha patjetër janë përgjegjësia ime. E nuk diskutohet që një qeveri me të gjithë ata që kur dalin bashkë thonë “jemi opozitë e bashkuar”, sot të kishte marrë çeljen e negociatave. Nëse në vend të Gentit, p.sh., do të ishte Nard Ndoka, konsensusi do të ishte i garantuar pa filluar fare takimi. Madje do ta kishin ftuar edhe në darkë që të dëgjonin se si duhet të jetë e ardhmja e BE-së. Këto janë normale, unë i mirëkuptoj, por nuk ka lidhje me temën.

Reformën zgjedhore, sipas rekomandimeve të OSBE/ODIHR-it, do ta mbarojmë përpara vitit të ri në Parlament, siç e kam thënë. Pas vitit të ri jemi të gatshëm të diskutojmë për temat e tjera të reformës, të hapur absolutisht. Reformën do ta bëjmë me dy shkallë. Një nga temat e diskutuara është dhe një temë e jona që ka të bëjë me votën e emigrantëve. Ne nuk do ta fusim në këtë shkallë të parë të reformës sepse do të merremi vetëm me rekomandimet e OSBE/ODIHR-it dhe para vitit të ri, ne do ta kemi kryer këtë proces dhe do ta kemi – si të thuash -shënuar si të kryer një kërkesë të Bundestagut, por që prapë i vlen Shqipërisë, i vlen sistemit tonë zgjedhor, i vlen procesit tonë elektoral sepse nuk do të ketë më komisione elektorale me parti politike. Kjo do të mbarojë para vitit të ri, duan apo nuk duan ata që me të drejtë kërkojnë përgjegjësi nga unë pse BE nuk po funksion si duhet.

Zoti Kryeministër, për t’ju rikthyer edhe njëherë Shengenit ballkanik, ndërkohë që BE vendos barrikadën, do të kërkoni ju forcimin e Shengenit ballkanik si kundërpërgjigje? Në kohën kur unë kam lindur, Shqipëria ka nisur rrugëtimin drejt BE. Edhe sa kohë do të  pres unë si qytetare e këtij vendi, – kanë kaluar më shumë  se 20 vite nga ajo kohë, – së bashku me bashkëmoshatarët  e mi, për të qenë qytetarë me të drejta të barabarta si bashkëmoshatarët e mi në Europë?

Kryeministri Rama: Në kohën kur unë kam dalë në rrugë për të kërkuar Shqipërinë si gjithë Europa, i kisha të gjitha flokët dhe kam përshtypjen se nëse do t’ia lë mjekrës ta dëshmojë, mund të bëhet më gjatë se flokët e tua, përpara se sa të plotësojmë dëshirën. Por, përtej kësaj, ky është një rrugëtim dhe Shqipëria sot është shumë më europiane, saç ishte kur ke lindur ti.

Shumë gjëra kanë ndryshuar, shumë gjëra duhet të ndryshojnë. Mos harroni që trashëgimia jonë është shumë e rëndë. Ne nuk jemi as Polonia, as Hungaria, as Çekia, as, sa të doni. Kemi patur dy ndërprerje të mëdha, njëra mbi 500 vjet, tjetra 50 e kusur vjet, kështu që kjo është e treta e vërteta, por ka të gjitha mundimet e veta. Kështu që duhet  t’ia bëjmë hyzmetin , do t’ia bëjmë të gjitha. Një gjë është e sigurt dhe këtë mos e dysho: Ti do të votosh për parlamentin Europian, në Shqipëri, pa diskutim. Se kur, do të bëjmë çmos që të jetë në një kohë të arsyeshme, por kjo është e sigurt. I gjithë brezi juaj që jeni këtu, – s’po fus veten time, – do të votojë dhe do të lodhet duke votuar për Parlamentin Europian. Natyrisht me prezumimin që do të ketë Parlamenti Europian se mbase gjërat do të ndryshojnë në një formë që këtë se di unë. Me siguri këtë e di Nard Ndoka, por kur të bëni konferencë shtypi me opozitën e bashkuar kërkojani parashikimin se si do të jetë BE në të ardhmen.

Ajo që unë mund të them me siguri është që këtu nuk bëhet fjalë për kundërpërgjigje. Nuk kemi kujt t’i kundërpërgjigjemi. Marrëveshjen e 4 lirive të BE-së vazhdoni e quani mini Shengeni, por nuk më pëlqen ky emër. Mbase mund ta quajmë Bashkimi Europian i juglindjes. Na e kanë vënë këtë emrin “Ballkani Perëndimor” dhe atyre kur ju thonë “Ballkani Perëndimor”, ju kujtohen vetëm imazhe… Nuk është kundërpërgjigje, nuk është as alternativë e rrugës europiane. Është pjesë e saj. Kemi vendin tonë, kemi rajonin tonë, kemi dhe kontinentin tonë. Dhe kemi fatin ku jetojmë në mes të një kontinenti, ku sot përjetohet nga njerëzit si shpikja më e madhe politike e njerëzimit  që është BE. Sigurisht është një projekt në një krizë për momentin, por është e përkohshme, nuk është e përjetshme. Në rajonin tonë kemi shumë potenciale, që duhet t’i çlirojmë. Kështu që janë të gjitha paralele, nuk ka kundërpërgjigje. Nuk kemi ne kujt t’i kundërpërgjigjemi. Sepse e dëgjova pak edhe të nderuarin Muhamet Veliu. Nuk ka këtu një përplasje antishqiptare. Nuk është këtu një vendim kundër Shqipërisë, nuk është marrë një vendim kundër Shqipërisë.

Është një vendim që nuk përputhet sot me interesin tonë dhe me pritshmërinë tonë sot, por ata janë më të mëdhenjtë, ne jemi më të vegjlit, kështu që nuk e diktojmë ne procesin e transformimit të BE. Por nuk ka këtu vend për kundërpërgjigje.

Europa është shpirti i këtij kombi, nuk ndahen dot këto të dyja. Nuk janë ndarë asnjëherë në mishërimin e këtij kombi që është kultura e vet dhe nuk ndahen.

Zoti Kryeministër, pas “JO”-së së Francës, a do të kërkoni ju votëbesim për zgjedhje të parakohshme dhe në këtë mënyrë ndoshta kënaqni edhe një prej kërkesave të opozitës. E së dyti, gjatë fjalës së tij presidenti Emanuel Makron sot u ndal në disa progrese që ka bërë Shqipëria, por theksoi faktin që azilkërkimi është problemi kryesor. Pse pikërisht azilkërkimi shqetëson Francën dhe a kanë shqiptarët faj që kërkojnë azil.

Kryeministri Rama:  Besoj që kësaj i dhashë përgjigje dhe nuk dua t’i rikthehem faktit që pse shqiptarët lëvizin dhe pse shqiptarët kërkojnë azil, edhe pse në këtë aspekt ka një anë shumë të erret që është ana e rrjeteve kriminale, të cilët për përfitimet e tyre organizojnë lëvizje të paligjshme dhe ne për këtë aspekt jemi në bashkëpunim me autoritet franceze dhe kemi bërë goxha punë.

Por sigurisht presidentit i duhet për tua thënë francezëve, e dëgjuat vetë. Ndërsa për sa i përket votëbesimit për të plotësuar një nga pikat për të kënaqur ata, unë mendoj që ne kemi absolutisht shumë gjëra për të bërë dhe nuk kemi asnjë kohë për të humbur. Kemi plot punë për të bërë dhe as nuk bëhet fjalë për të kënaqur askënd që nuk ka punë, apo që nuk di t’i gjejë punë vetes.

Flas për ata që merren me politikë, për ata që kanë ato listat që thonë “i kemi dërguar platformën, zbatoje apo hap krahun”. Për këta e kam fjalën, se mos keqkuptoheni.

Tashmë që u refuzuam, ka një kosto financiare, sa para kemi humbur duke mos u çelur negociatat dhe çfarë garancie do t’u jepni investitorëve të huaj që të vijnë dhe të investojnë në Shqipëri, në një vend që tashmë nuk është as në paradhomën e BE.

Kryeministri Rama: E para, jemi në paradhomë, nuk jemi kandidatë. E dyta, unë shpresoj shumë që së shpejti ne të jemi gati për të lançuar dy apo tre projekte të mëdha investimesh për të cilat kemi disa vite që po punojmë. Ju siguroj që nuk ka absolutisht asnjë shqetësim në këtë drejtim. Ajo që ne na duhet të bëjmë është që të vazhdojmë të përmirësojmë klimën ndaj biznesit, të vazhdojmë të përmirësojmë mënyrën sesi funksionon shteti në raport me investitorët nga pikëpamja e burokracive, etj., por janë të gjitha gjërat tona. Askush nuk e merr këtë si përjashtim nga e ardhmja europiane.

Si përjashtim nga e ardhmja europiane, këtë mund ta marrin vetëm ata që duan të konsumojnë këtu politikë të ditës, por nuk është përjashtim nga e ardhmja europiane. Kjo është një temë që do të vazhdojë të diskutohet, nuk e di se çfarë do të ndodhë me metodologjinë. Është një proces evolucioni i brendshëm i BE-së. Serbia dhe Mali i Zi janë në negociata. Do të ndryshojë dhe për ta. Pra, është një ndryshim i metodës së afrimit drejt integrimit. Duhet ta kuptojmë këtë gjë. Nuk ka asnjë fatalitet.

Përsa i përket parave të humbura në këtë aspekt dhe kjo është gjëja që i kam thënë në mënyrë të përsëritur gjatë gjithë kësaj kohe, të gjithë atyre që kam patur mundësinë të takoj, që kjo është diçka që juve nuk ju kushton, kurse ne na duhet shumë për të bërë më shpejt, më mirë shtetin europian që duam për  fëmijët tanë, jo për ju. Por, natyrisht, duke e bërë si ju, bëhemi pjesë integrale e juaja.

Në fjalën e sotme, Presidenti i Francës e tha përsëri, – unë e kam dëgjuar, e ka nënvizuar disa herë, – nuk di se çfarë forme do të marri kjo, ai kërkon një qasje të re ekonomike ndaj Ballkanit Perëndimor. E dëgjuat besoj që e nënvizoi këtë. Nuk dihet se i do të artikulohet kjo, sepse për momentin është në një formë të mjegulluar, por them që duhet të jeni patjetër aspak pesimistë lidhur me ecurinë e procesit tonë dhe duhet të bëjmë sforcon maksimale për t’i bërë gjërat sa më mirë këtu, për veten tonë, për njerëzit tanë, për fëmijët tanë. Sa më mirë që të bëhemi këtu, aq më shumë mundësi do të kemi për të patur vendin dhe zërin tonë në çdo mënyrë që do të konfigurohet Bashkimi Europian.

Ju falënderoj shumë dhe këtu jemi prapë për të gjitha të rejat që do të vinë nga fronti i jo BE-së.

PËRGJIGJU

Please enter your comment!
Please enter your name here

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.